സംസ്ഥാനത്ത് സമ്പൂർണ വെജിറ്റബിൾ മിഷൻ നടപ്പാക്കും- മന്ത്രി ടി.സിദ്ദിഖ്
അമിതമായ കീടനാശിനി ഉപയോഗം ഒഴിവാക്കി പരമ്പരാഗത കാർഷിക സംസ്കാരം വീണ്ടെടുക്കുന്നതിനും ഓരോ വീടുകളും കൃഷിയിടങ്ങളായി മാറണമെന്ന് കൃഷി മന്ത്രി ടി. സിദ്ദിഖ് പറഞ്ഞു. അടുത്ത സാമ്പത്തിക വർഷത്തോടെ സംസ്ഥാനത്ത് സമ്പൂർണ വെജിറ്റബിൾ മിഷൻ നടപ്പാക്കുന്നതിനുള്ള നടപടികൾ സർക്കാർ ആരംഭിച്ചതായും മന്ത്രി അറിയിച്ചു. തിരുവനന്തപുര അണ്ടൂർക്കോണം ഗ്രാമപഞ്ചായത്തിലെ പള്ളിപ്പുറം പാടശേഖരത്തിലെ കൊയ്ത്തുത്സവം ഉദ്ഘാടനം ചെയ്യുകയായിരുന്നു അദ്ദേഹം.
വർഷങ്ങളായി തരിശുകിടന്ന പള്ളിപ്പുറം പാടശേഖരം കൃഷി വകുപ്പിന്റെയും ജനപ്രതിനിധികളുടെയും കർഷകരുടെയും കൂട്ടായ പരിശ്രമത്തിലൂടെ കൃഷിയോഗ്യമാക്കിയത് മാതൃകാപരമായ പ്രവർത്തനമാണ്. ഭക്ഷ്യ സ്വയംപര്യാപ്തതയിലേക്കുള്ള നിർണായക ചുവടുവെപ്പാണ് പാടശേഖരത്തിലെ കൊയ്ത്തുത്സവമെന്നും മന്ത്രി പറഞ്ഞു.
125 ഏക്കർ വിസ്തൃതിയുള്ള പാടശേഖരത്തിൽ ‘ശ്രേയസ്’ നെൽവിത്താണ് കൃഷിക്കായി ഉപയോഗിച്ചത്. 2026 ജൂൺ 29നായിരുന്നു വിത്തിറക്കിയത്. കൃഷിക്ക് നേതൃത്വം നൽകിയ കർഷകരായ ഗോപിനാഥൻ, കുഞ്ഞുമോൻ, വിവേക്, ഷൂട്ടർ സനോജ്, കൃഷി ഓഫീസർ റോഷ്ന എസ്. എന്നിവരെ മന്ത്രി ചടങ്ങിൽ ആദരിച്ചു.
ജി.ആർ. അനിൽ എം.എൽ.എ, ജില്ലാ പഞ്ചായത്ത് പ്രസിഡന്റ് വി. പ്രിയദർശിനി, പോത്തൻകോട് ബ്ലോക്ക് പഞ്ചായത്ത് പ്രസിഡന്റ് ജോളി പത്രോസ്, പ്രിൻസിപ്പൽ കൃഷി ഓഫീസർ ദീപ വി., കൃഷി ഓഫീസർ റോഷ്ന എസ്. തുടങ്ങിയവർ പങ്കെടുത്തു.




















