ശ്വാസകോശം മാറ്റിവെച്ച് ചരിത്രം കുറിച്ച് കോട്ടയം മെഡിക്കൽ കോളേജ്
ഇന്ത്യയില് ആദ്യമായി ഒറ്റ ദിവസം ഹൃദയം, ശ്വാസകോശം, വൃക്ക എന്നിങ്ങനെ മൂന്ന് അവയവങ്ങള് മാറ്റിവെച്ച് ചരിത്രം കുറിച്ച് കോട്ടയം മെഡിക്കല് ആശുപത്രി. പതിനൊന്നാമത്തെ ഹൃദയം മാറ്റിവയ്ക്കല് ശസ്ത്രക്രിയയും കൂടിയാണ് കോട്ടയം മെഡിക്കല് കോളേജില് നടന്നത്.
ഡൽഹി എയിംസിന് ശേഷം സർക്കാർ മേഖലയിൽ ശ്വാസകോശം മാറ്റിവെക്കൽ ശസ്ത്രക്രിയ വിജയകരമായി പൂർത്തിയാക്കിയിരിക്കുകയാണ് കോട്ടയം മെഡിക്കൽ കോളേജ്. ഹൃദയം, ശ്വാസകോശം മാറ്റിവയ്ക്കല് ശസ്ത്രക്രിയകള്ക്ക് നേതൃത്വം നല്കിയത് കാര്ഡിയോ തൊറാസിക് വിദഗ്ധനും സൂപ്രണ്ടുമായ ഡോ. ടി.കെ. ജയകുമാറും വൃക്ക മാറ്റിവയ്ക്കല് ശസ്ത്രക്രിയയ്ക്ക് നേതൃത്വം നല്കിയത് ഡോ. രാജീവനുമാണ്. ശസ്ത്രക്രിയകള്ക്ക് നേതൃത്വം നല്കിയ ടീമിനെ ആരോഗ്യ മന്ത്രി വീണാ ജോർജ് അഭിനന്ദിച്ചു.
കോട്ടയം മെഡിക്കല് കോളേജില് മസ്തിഷ്ക മരണം സംഭവിച്ച തിരുവനന്തപുരം പൂഴനാട് കാവിന്പുറത്ത് വീട്ടില് എ.ആര്. അനീഷിന്റെ (38) അവയവങ്ങളാണ് ദാനം ചെയ്തത്. എട്ട് അവയവങ്ങളാണ് ദാനം ചെയ്തത്. അതില് ഒരു വൃക്കയും ഹൃദയവും ശ്വാസകോശവും രണ്ട് നേത്രപടലങ്ങളും കോട്ടയം മെഡിക്കല് കോളേജിലെ രോഗികള്ക്കാണ് ലഭിച്ചത്.
ഡോക്ടര്മാര്, നഴ്സുമാര്, ഫെര്ഫ്യൂഷനിസ്റ്റുകള്, ടെക്നീഷ്യന്മാര്, മറ്റ് ജീവനക്കാര് ഉള്പ്പെടെ 50 ഓളം പേരാണ് രാത്രി പകലാക്കി മൂന്ന് മേജര് ശസ്ത്രക്രിയകള്ക്ക് നേതൃത്വം നല്കിയത്. മൂന്ന് ഓപ്പറേഷന് തീയറ്ററുകളില് മൂന്ന് ടീമുകളാണ് ശസ്ത്രക്രിയ നടത്തിയത്. ഇന്നലെ വൈകുന്നേരം ആറ് മണിയോടെയാണ് ദാതാവില് നിന്നുള്ള അവയവങ്ങള് സ്വീകരിക്കാനുള്ള ശസ്ത്രക്രിയ ആരംഭിച്ചത്. തുടര്ന്ന് ഒമ്പത് മണിയോടെ സ്വീകര്ത്താക്കള്ക്ക് അവയവം മാറ്റിവയ്ക്കുന്ന മൂന്ന് ശസ്ത്രക്രിയകളും ആരംഭിച്ചു.
പുലര്ച്ചെ രണ്ട് മണിയോളം നീളുന്നതായിരുന്നു ശസ്ത്രക്രിയകള്. തൃശൂര് സ്വദേശിയായ 59 വയസുകാരന് ഹൃദയവും കോട്ടയം സ്വദേശിനിയായ 27 വയസുകാരിക്ക് ശ്വാസകോശവും പത്തനംതിട്ട സ്വദേശിയായ 38 വയസുകാരന് വൃക്കയും വെച്ചുപിടിപ്പിച്ചു. ശസ്ത്രക്രിയ വിജയകരമാണെന്ന് ഡോക്ടര്മാര് അറിയിച്ചു. എങ്കിലും അവയവം മാറ്റിവയ്ക്കല് ശസ്ത്രക്രിയയായതിനാല് ഒരാഴ്ചയോളം നിര്ണായകമാണ്.