ഹൃദയഹാരിയായ ഗാനങ്ങള് സമ്മാനിച്ച സ്നേഹസാഗരം- മോഹൻലാൽ
ഹൃദയഹാരിയായ ഗാനങ്ങള് സമ്മാനിച്ച സ്നേഹസാഗരമാണ് ജാനകിയമ്മ എന്ന് നടൻ മോഹൻലാൽ അനുസ്മരിച്ചു. ഫേസ്ബുക്ക് പോസ്റ്റിലാണ് അനുസ്മരണം. മഞ്ഞില് വിരിഞ്ഞ പൂക്കളിലെ ഗാനങ്ങള് പാടിയ ഗായിക എന്ന നിലയില് ഒരിക്കലും മറക്കാനാവാത്ത കടപ്പാടാണ് ജാനകിയമ്മയോട് തനിക്കുള്ളതെന്നും ഫേസ്ബുക്കിൽ കുറിച്ചു.
കുറിപ്പ് ഇങ്ങനെ: ഭാരതത്തിന്റെ ഗാനകോകിലം ജാനകിയമ്മ നമ്മെ വിട്ടു പിരിഞ്ഞു. ഒരു കാലഘട്ടം മുഴുവന് മലയാളവും ഹിന്ദിയുമടക്കമുള്ള ഭാഷകളില് എത്രയെത്ര ഹൃദയഹാരികളായ ഗാനങ്ങള് സമ്മാനിച്ച സ്നേഹസാഗരമാണ് ജാനകിയമ്മ. മലയാളി മനസ്സുകളില് തേനും വയമ്പും നിറച്ച കാലാതീതമായ ഒട്ടേറെ ഗാനങ്ങള് സംഭാവന ചെയ്ത അനുഗ്രഹീത ഗായിക.
എന്റെ ആദ്യചിത്രമായ ‘മഞ്ഞില് വിരിഞ്ഞ പൂക്കളിലെ’ ഗാനങ്ങള് പാടിയ ഗായിക എന്ന നിലയില് ഒരിക്കലും മറക്കാനാവാത്ത കടപ്പാടാണ് ജാനകിയമ്മയോട് എനിക്കുള്ളത്. സന്തോഷവും വിഷാദവും കുട്ടിത്തവും ഉള്പ്പെടെയുള്ള എല്ലാ മനുഷ്യഭാവങ്ങള്ക്കും ജാനകിയമ്മ തന്റെ മധുരസ്വരം പകര്ന്നു നല്കി. ആദ്യചിത്രത്തിന് ശേഷവും ജാനകിയമ്മ ആലപിച്ച ഒട്ടനവധി ഗാനരംഗങ്ങളുടെ ഭാഗമാകാന് എനിക്ക് ഭാഗ്യമുണ്ടായി.
എല്ലാവരേയും സമഭാവനയോടെ കാണുന്ന ശാന്തശീലയായ അമ്മമനസ്സിനുടമയായിരുന്നു അവര്. വ്യക്തിപരമായ എനിക്ക് ഏറേ അടുപ്പമുണ്ടായിരുന്നു ജാനകിയമ്മയുമായി. അമ്മയുടെ ആത്മാവിന് നിത്യശാന്തി നേരുന്നു.