നിപ: സംസ്ഥാനത്ത് 723 പേര് സമ്പര്ക്കപ്പട്ടികയിൽ
പാലക്കാട് മരണപ്പെട്ടയാളുടെ മകന് പ്രാഥമിക പരിശോധനയില് നിപ സംശയമുണ്ടായതോടെ റൂട്ട് മാപ്പ് തയ്യാറാക്കി പ്രതിരോധ പ്രവര്ത്തനങ്ങള് ശക്തമാക്കിയതായി ആരോഗ്യ മന്ത്രി വീണാ ജോര്ജ് അറിയിച്ചു.
മഞ്ചേരി മെഡിക്കല് കോളേജില് നടത്തിയ പ്രാഥമിക പരിശോധനയിലാണ് നിപ സംശയിച്ചത്. സമ്പര്ക്ക പട്ടികയിലുള്ള ഇദ്ദേഹം ഐസൊലേഷനില് ആയിരുന്നു. ഫാമിലി ട്രീ തയ്യാറാക്കിയിട്ടുണ്ട്. ആവശ്യമായ എല്ലാവര്ക്കും മാനസിക പിന്തുണ ഉറപ്പാക്കാന് മന്ത്രി നിര്ദേശം നല്കി.
വിവിധ ജില്ലകളിലായി 723 പേരാണ് നിപ സമ്പര്ക്കപ്പട്ടികയിലുള്ളത്. ഇതില് 51 പേരാണ് പുതുതായി നിപ സംശയിക്കുന്നയാളുടെ സമ്പര്ക്കപ്പട്ടികയിലുള്ളത്. പാലക്കാട് 394, മലപ്പുറം 212, കോഴിക്കോട് 114, എറണാകുളം 2, തൃശൂർ 1 എന്നിങ്ങനെയാണ് വിവിധ ജില്ലകളിൽ സമ്പര്ക്കപ്പട്ടികയിലുള്ളത്. മലപ്പുറത്ത് 10 പേര് ഐസൊലേഷനില് ചികിത്സയിലുണ്ട്.
മലപ്പുറത്ത് ഇതുവരെ 84 സാമ്പിളുകള് നെഗറ്റീവ് ആയിട്ടുണ്ട്. പാലക്കാട് ഏഴ് പേര് ഐസൊലേഷനില് ചികിത്സയിലാണ്. സംസ്ഥാനത്ത് 38 പേര് ഹൈയസ്റ്റ് റിസ്കിലും 142 പേര് ഹൈ റിസ്ക് വിഭാഗത്തിലും നിരീക്ഷണത്തിലാണ്.