പൂക്കളമല്ല, ഇത് കയർ കോർപ്പറേഷൻ്റെ കയർക്കളം

ഓണത്തിന് എല്ലായിടത്തും വിവിധ വർണ്ണത്തിലുള്ള പൂക്കൾ കൊണ്ട് പൂക്കളം തീർത്തപ്പോൾ കയറിൻ്റെ വർണ്ണ ഭംഗിയിൽ ഒരു കൂറ്റൻ പൂക്കളം. കയർ ഉല്പന്നങ്ങൾ കൊണ്ട് കളം തീർത്താണ് സംസ്ഥാന കയർ കോർപ്പറേഷൻ ഇത്തവണ ഓണത്തെ വരവേറ്റത്.

40 അടി നീളവും വീതിയുമുള്ള കയർക്കളമാണ് ആലപ്പുഴ കയർ കോർപ്പറേഷൻ അങ്കണത്തിൽ ഒരുക്കിയിട്ടുള്ളത്. പീലി വിടർത്തിയ

മയിലിൻ്റെ രൂപമാണ് വിവിധ വർണ്ണങ്ങളിൽ കയർ ഉത്പന്നങ്ങൾ കൊണ്ട് തീർത്തിരിക്കുന്നത്. നാല് ജീവനക്കാരുടെ നേതൃത്വത്തിൽ ഒരാഴ്ച കൊണ്ടാണ് കളമൊരുക്കിയത്.

കയർ ഭൂവസ്ത്രം, കയർ ഉല്പന്നങ്ങൾ, പ്രകൃതിദത്ത ചായം എന്നിങ്ങനെ പൂർണ്ണമായും കയർ ഉല്പന്നങ്ങൾ കൊണ്ടാണ് കയർക്കളം തീർത്തിരിക്കുന്നത്. നടുക്കളത്തിൽ ഉപയോഗിച്ചിരിക്കുന്നത് കയർ കൊക്കോ നൂലുകളാണ്. രണ്ടാഴ്ചക്കാലം സന്ദർശകർക്ക്  സൗജന്യമായി കയർക്കളം കാണാനുള്ള അവസരം ഒരുക്കിയിട്ടുണ്ട്.