‘ഗുരുവായൂർ കേശവനി’ലെ നായിക ജയഭാരതിക്ക് ആദരം

വെളളിത്തിരയിൽ ഗുരുവായൂർ കേശവൻ്റെ കഥ അനശ്വരമാക്കിയ  നടി ജയഭാരതിക്ക് ഗുരുവായൂർ ദേവസ്വത്തിൻ്റെ ആദരം.’ ഗുരുവായൂർ കേശവൻ’ സിനിമയിലെ നായികയാണ് ജയഭാരതി. ഗജരാജൻ ഗുരുവായൂർ കേശവനെ നടയിരുത്തിയതിൻ്റെ ശതാബ്ദിയിലാണ്  ഗുരുവായൂർ ദേവസ്വം  ജയഭാരതിക്ക് സ്നേഹാദരം നൽകിയത്.

ഗുരുവായൂർ ക്ഷേത്ര ദർശനത്തിനെത്തിയ ജയഭാരതിയെ  ശ്രീവത്സം അതിഥി മന്ദിരത്തിൽ വെച്ച്  ദേവസ്വം ചെയർമാൻ ഡോ.വി.കെ.വിജയൻ പൊന്നാടയണിയിച്ചു. കേശവൻ ശതാബ്ദിയുടെ  സ്മരണക്കായി ദേവസ്വം നടത്തി വരുന്ന ‘കേശവീയം 2023’ പരിപാടിയുടെ ലോഗോ  ഉപഹാരമായി

സമ്മാനിച്ചു. അഡ്മിനിസ്ട്രേറ്റർ കെ.പി.വിനയൻ നിലവിളക്കും ഉപഹാരമായി നൽകി. ദേവസ്വം ഭരണസമിതി അംഗം സി.മനോജും ചടങ്ങിൽ സന്നിഹിതനായി.

സ്നേഹാദരവിന് നന്ദിയറിയിച്ച ജയഭാരതി ഗുരുവായൂർ കേശവൻ്റെ ഷൂട്ടിങ്ങ് ഓർമ്മകളും പങ്കിട്ടു .” അന്ന്  ഇവിടുത്തെ ദേവസ്വം ആന പറമ്പിലായിരുന്നു ഷൂട്ട്. ആന പുറത്ത് കയറിയ നാളുകൾ. ആ ഓർമ്മകൾ ഇന്നും മനസിലുണ്ട്. ഗുരുവായൂർ ദർശനത്തിന് എത്തുമ്പോഴെല്ലാം ഈ ഓർമ്മകൾ ഓടിയെത്തും ” -അവർ പറഞ്ഞു.

1977 ൽ പുറത്തിറങ്ങിയ ആ സിനിമയിലെ ജീവിച്ചിരിക്കുന്ന ചലച്ചിത്ര താരമാണ് ജയഭാരതി. സിനിമാ അനുഭവങ്ങൾ പങ്കുവെച്ചതിനു ശേഷം ദേവസ്വം ഭരണസമിതി അംഗം സി.മനോജിനൊപ്പം ക്ഷേത്രത്തിലെത്തിയ ജയഭാരതി ദീപാരാധന ദർശിച്ചാണ് മടങ്ങിയത്.