ഗുരുവായൂരിൽ വെർച്വൽക്യൂ ദർശനം തുടങ്ങി

ഗുരുവായൂർ ക്ഷേത്രത്തിൽ ഭക്തർക്ക് സുഖ ക്ഷേത്ര ദർശനത്തിനായുള്ള വെർച്വൽ ക്യൂ തുടങ്ങി. രാവിലെ ഏഴു മുതൽ എട്ടുവരെയുള്ള ആദ്യ ഘട്ടത്തിൽ നിരവധി ഭക്തർ വെർച്വൽ ക്യൂ ദർശനം വഴി ശ്രീഗുരുവായൂരപ്പനെ തൊഴുതു.

രാവിലെ ആറരയോടെ ക്ഷേത്രം കിഴക്കേ നടയിൽ ഭഗവതിയമ്പലത്തിലേക്കുള്ള പ്രവേശന കവാടത്തിന് സമീപം നടന്ന ചടങ്ങിൽ ദേവസ്വം ചെയർമാൻ  എ.വി.ഗോപിനാഥ്  നാട മുറിച്ച് വെർച്വൽ ക്യൂ ദർശനത്തിൻ്റെ ഉദ്ഘാടനം നിർവ്വഹിച്ചു. തിരിച്ചറിയൽ രേഖ പരിശോധനക്ക് ശേഷം കെ.രഘുനാഥൻ പിള്ള എന്ന ഭക്തനാണ് ആദ്യ വെർച്വൽ ക്യൂ ദർശനം നേടിയത്.

ദേവസ്വം ജീവനക്കാർ ,മാധ്യമ പ്രവർത്തകർ എന്നിവരുടെ സാന്നിധ്യത്തിലായിരുന്നു ഉദ്ഘാടനചടങ്ങ്. ഇടവിട്ട് പെയ്ത മഴയും പ്രതികൂല കാലാവസ്ഥയും മറികടന്നെത്തിയ നൂറിലേറെ ഭക്തർക്ക് ആദ്യ മണിക്കൂറിൽ ദർശനം സാധ്യമായി. ഉച്ചയ്ക്ക് ഒരു മണി വരെ 1800 ഭക്തർ വെർച്വൽ ദർശനത്തിന് ബുക്ക് ചെയ്തിട്ടുണ്ട്.

തിരിച്ചറിയൽ രേഖ ഹാജരാക്കണം

പരീക്ഷണടിസ്ഥാനത്തിൽ തുടങ്ങിയ വെർച്വൽ ക്യൂ ദർശനത്തിനായെത്തുന്ന ഭക്തർ ഓൺലൈനിൽ ബുക്ക് ചെയ്തതിൻ്റെ രസീതിയുമായി അര മണിക്കൂർ മുമ്പ് റിപ്പോർട്ട് ചെയ്യണം. കിഴക്കേനടയിലെ  ക്യൂ കോംപ്ലക്സിൻ്റെ വടക്കേ അറ്റത്തെ വരിയാണ് വെർച്വൽ ക്യൂ ദർശനക്കാർക്കായി ഏർപ്പെടുത്തിയിട്ടുള്ളത്. ബുക്ക് ചെയ്യാനുപയോഗിച്ച തിരിച്ചറിയൽ രേഖ തന്നെ കയ്യിൽ കരുതണം. ഇത് സുരക്ഷാ ജീവനക്കാർക്ക് പരിശോധനക്കായി നൽകണം.

ചൊവ്വ, വ്യാഴം ദിവസങ്ങളിൽ രാവിലെ ഏഴു മുതൽ ഉച്ചവരെ ഓരോ മണിക്കൂർ വീതവും വൈകീട്ട് നാലു മുതൽ അഞ്ചുവരെയുമാണ് വെർച്വൽ ക്യൂ വഴിയുള്ള ദർശനം. ഓരോ മണിക്കൂറിലും 300 പേരെ വീതം പ്രവേശിപ്പിക്കും. ചൊവ്വ, വ്യാഴം   ദിവസങ്ങളിലാണ് വെർച്വൽ ക്യൂ വഴി ദർശനം. ദർശനത്തിനെത്തുന്ന ഭക്തർ തിരിച്ചറിയൽ രേഖ ഹാജരാക്കേണ്ടതാണ്. സെപ്റ്റംബറിലെ വെർച്വൽ ക്യൂ ദർശനത്തിനായുള്ള ബുക്കിങ്ങ് വൈകാതെ ആരംഭിക്കും. ബുക്കിങ്ങിന് https://guruvayurdevaswom.in