ദേശീയ ഫെന്‍സിങ്ങില്‍ മത്സരിക്കാൻ കാസര്‍കോട്ടെ താരങ്ങള്‍
കാസർകോട്ടെ താരങ്ങൾ ദേശീയ ഫെ ൻസിങ് മത്സരത്തിലേക്ക്. തിരുവനന്തപുരം പെരിങ്ങമന ഇന്‍ഡോര്‍ സ്റ്റേഡിയത്തില്‍ ഫെബ്രുവരി 17, 18 തീയതികളില്‍ നടന്ന 25ാമത് കേരള സ്റ്റേറ്റ് സബ് ജൂനിയര്‍ ഫെന്‍സിങ് ചാമ്പ്യന്‍ഷിപ്പില്‍ കാസര്‍കോട് മൂന്നാം സ്ഥാനം കരസ്ഥമാക്കിയിരുന്നു.
റൈഫാനത്ത് അമാന, അനെയ്ത നമ്പ്യാര്‍, മുഹമ്മദ് റൈഹാന്‍ എന്നീ ഫെന്‍സിങ് താരങ്ങള്‍ 2024 മാര്‍ച്ച് 25 മുതല്‍ 28 വരെ ആന്ധ്രാപ്രദേശില്‍ നടക്കുന്ന ദേശീയ മത്സരങ്ങളില്‍ പങ്കെടുക്കാൻ യോഗ്യത നേടിയിരുന്നു. എപ്പേ പെണ്‍കുട്ടികളുടെ ഗ്രൂപ്പ് ഇനത്തില്‍ റെയ്ഫനാത് അമാന, അനെയ്ത നമ്പ്യാര്‍, ഡി.അനുഷ്‌ക തുടങ്ങിയവര്‍ സ്വര്‍ണ മെഡല്‍ നേടിയപ്പോള്‍ വ്യക്തിഗത ഇനത്തില്‍ റെയ്ഫനാത് അമാന വെള്ളി മെഡലും അനെയ്ത നമ്പ്യാര്‍ വെങ്കലമെഡലും കരസ്ഥമാക്കി.
മുഹമ്മദ് റൈഹാന്‍, സുജയ് കൃഷ്ണ, ടി.എം.മുഹമ്മദ് ഹനാന്‍ എന്നിവരടങ്ങുന്ന ആണ്‍കുട്ടികളുടെ ഫെന്‍സിങ് സാബര്‍ ഗ്രൂപ്പിനത്തില്‍ വെങ്കല മെഡലും കുട്ടികളുടെ ഫെന്‍സിങ് ഫോയില്‍ ഗ്രൂപ്പിനത്തില്‍ തന്‍വീര്‍ അലി, മുഹമ്മദ് സുല്‍ത്താന്‍, മുഹമ്മദ് ഷുജ തുടങ്ങിയവര്‍ വെങ്കല മെഡലുകളും കരസ്ഥമാക്കിയാണ് കാസര്‍കോട് ജില്ലാ സബ് ജൂനിയര്‍ വിഭാഗത്തില്‍ സംസ്ഥാന തലത്തില്‍ മൂന്നാം സ്ഥാനത്തെത്തിയത്.
കേരള സ്റ്റേറ്റ് സ്‌പോര്‍ട്‌സ് കൗണ്‌സിലിന്റെ കീഴില്‍ ഖേലോ ഇന്ത്യ ഡേ ബോര്‍ഡിങ് സ്‌കീം പ്രകാരം 2022ല്‍ ആണ് ജില്ലാ സ്‌പോര്‍ട്‌സ് അക്കാദമി കേന്ദ്രമായി ഫെന്‍സിങ് ട്രെയിനിങ് ആരംഭിച്ചത്. പി.ടി.എം.എ.യു.പി സ്‌കൂള്‍ ബെദിര, ടി.ഐ.എച്ച്.എസ്.എസ്.നായന്മാര്‍മൂല, ചിന്മയ വിദ്യാലയ വിദ്യാനഗര്‍, കേന്ദ്രിയ വിദ്യാലയം നമ്പര്‍ ടു, വിദ്യാനഗര്‍ എന്നിവിടങ്ങളില്‍ നിന്ന് തിരഞ്ഞെടുക്കപ്പെട്ട മുപ്പതോളം വിദ്യാര്‍ത്ഥികള്‍ക്കാണ് രാവിലെയും വൈകിട്ടുമായി ഉദയഗിരിയിലുള്ള ജില്ലാ സ്‌പോര്‍ട്‌സ് അക്കാദമിയില്‍ പരിശീലനം നല്‍കി വരുന്നത്. ഡോണ മരിയ ടോം ആണ് ഫെന്‍സിങ് പരിശീലക.