മസ്തിഷ്കത്തിൽ അമീബയും ഫങ്കസും ബാധിച്ച കുട്ടിയെ ചികിത്സിച്ച് രക്ഷപ്പെടുത്തി
മസ്തിഷ്കത്തിൽ അമീബയും ഫങ്കസും ബാധിച്ച വിദ്യാര്ത്ഥിയെ തിരുവനന്തപുരം മെഡിക്കല് കോളേജ് ചികിത്സിച്ച് രക്ഷപ്പെടുത്തി. അമീബിക് മസ്തിഷ്ക ജ്വരവും ആസ്പര്ജില്ലസ് ഫ്ലാവസും ഒരുമിച്ച് ബാധിച്ച ഒരാള് രക്ഷപ്പെടുന്നത് ലോകത്ത് ഇതാദ്യമായാണ് എന്ന് മെഡിക്കൽ രേഖകൾ വ്യക്തമാക്കുന്നതായി ആരോഗ്യ മന്ത്രി വീണാ ജോർജ് അറിയിച്ചു.
ഗുരുതരമായ അമീബിക് മെനിഞ്ചോ എന്സെഫലൈറ്റിസ് ബാധിച്ച് മൂന്ന് മാസത്തോളം ചികിത്സയിലായിരുന്ന കൊല്ലം ശൂരനാട് സ്വദേശിയായ വിദ്യാര്ത്ഥിയേയാണ് തിരുവനന്തപുരം മെഡിക്കല് കോളേജ് ആശുപത്രിയില് നിന്ന് പൂര്ണ ആരോഗ്യത്തോടെ ഡിസ്ചാര്ജ് ചെയ്തത്. മികച്ച ചികിത്സയും പരിചരണവും ഒരുക്കി കുട്ടിയെ രക്ഷിച്ചെടുത്ത മെഡിക്കല് കോളേജിലെ മുഴുവന് ടീമിനേയും രോഗം കൃത്യ സമയത്ത് കണ്ടുപിടിച്ച ആലപ്പുഴ മെഡിക്കല് കോളേജിലെ ടീമിനേയും ആരോഗ്യ മന്ത്രി വീണാ ജോർജ് അഭിനന്ദിച്ചു.
നാല് മാസം മുമ്പ് കുളത്തില് മുങ്ങിക്കുളിച്ച് ഒരാഴ്ച കഴിഞ്ഞപ്പോള് കുട്ടിയ്ക്ക് മസ്തിഷ്കജ്വരം ഉണ്ടാകുകയും അതിനെ തുടര്ന്ന് ബോധക്ഷയവും ഇടത് വശം തളരുകയും ചെയ്തു. തുടര്ന്ന് കുട്ടിയെ ആലപ്പുഴ മെഡിക്കല് കോളേജ് ആശുപത്രിയില് പ്രവേശിപ്പിച്ചു. അവിടെ നടത്തിയ പരിശോധനയില് സെറിബ്രോ സ്പൈനല് ഫ്ലൂയിഡില് അമീബയുടെ സാന്നിധ്യം കണ്ടെത്തി.
ഉടന് തന്നെ സംസ്ഥാന പ്രോട്ടോകോള് പ്രകാരമുള്ള അമീബിക് മസ്തിഷ്കജ്വര ചികിത്സ ആരംഭിച്ചതോടെ തളര്ച്ചയ്ക്കും ബോധക്ഷയത്തിനും മാറ്റമുണ്ടായി. എങ്കിലും, കാഴ്ച മങ്ങുകയും തലച്ചോറിനകത്ത് സമ്മര്ദ്ദം കൂടുകയും പഴുപ്പ് കെട്ടുകയും ചെയ്തതിനെ തുടര്ന്ന് കുട്ടിയെ തിരുവനന്തപുരം മെഡിക്കല് കോളേജ് ആശുപത്രിയിലേക്ക് മാറ്റി.
മെഡിക്കല് കോളേജില് കുട്ടിയെ വിദഗ്ധ പരിശോധനയ്ക്ക് വിധേയനാക്കി. എംആര്ഐ സ്കാനിംഗില് തലച്ചോറില് പലയിടത്തായി പഴുപ്പ് കെട്ടിക്കിടക്കുന്നതായി കണ്ടെത്തിയതിനെ തുടര്ന്ന് ന്യൂറോ സര്ജറി വിഭാഗത്തിന്റെ നേതൃത്വത്തില് അടിയന്തര ശസ്ത്രക്രിയ നടത്തി പഴുപ്പ് നീക്കം ചെയ്തു. ആദ്യഘട്ട ചികിത്സയ്ക്ക് ശേഷം രോഗം വീണ്ടും മൂര്ച്ഛിച്ചതിനെ തുടര്ന്ന് വീണ്ടും ശസ്ത്രക്രിയ വേണ്ടിവന്നു.
രണ്ടാമത്തെ ശസ്ത്രക്രിയയില് നീക്കം ചെയ്ത പഴുപ്പ് പരിശോധിച്ചപ്പോള് ആസ്പര്ജില്ലസ് പ്ലാവസ് എന്ന ഫംഗസിന്റെ സാന്നിധ്യം കൂടി കണ്ടെത്തി. തുടര്ന്ന് മരുന്നുകളില് മാറ്റം വരുത്തി വിദഗ്ധ ചികിത്സ തുടര്ന്നു. ഒന്നര മാസത്തോളം നീണ്ട ഈ തീവ്ര ചികിത്സയെ തുടര്ന്ന് രോഗം പൂര്ണമായും ഭേദമായി. രോഗം ഭേദമായതോടെ കുട്ടിയെ ഡിസ്ചാര്ജ് ചെയ്തു. മൂന്ന് മാസത്തെ കഠിന പ്രയത്നത്തിനൊടുവില് കുട്ടി പൂര്ണ ആരോഗ്യത്തോടെ ജീവിതത്തിലേക്ക് മടങ്ങി.
തിരുവനന്തപുരം മെഡിക്കല് കോളേജിൽ ന്യൂറോ സര്ജറി, മെഡിസിന്, ഇന്ഫെക്ഷ്യസ് ഡിസീസസ് വിഭാഗം, മൈക്രോബയോളജി വിഭാഗങ്ങൾ എന്നിവർ ചികിത്സയില് പങ്കാളികളായി. രോഗം ആദ്യം കണ്ടുപിടിച്ച ആലപ്പുഴ മെഡിക്കല് കോളേജിലെ മെഡിസിന്, ന്യൂറോളജി, മൈക്രോബയോളജി ഡിപ്പാർട്ട്മെന്റുകൾ ചികിത്സയ്ക്ക് നേതൃത്വം നൽകി.