വേമ്പനാട് കായല്‍ ശുചീകരണം: 9.23 ടണ്‍ പ്ലാസ്റ്റിക് മാലിന്യം നീക്കി
വേമ്പനാട് കായല്‍ പുനരുജ്ജീവന, സംരക്ഷണ പ്രവര്‍ത്തനങ്ങളുടെ ഭാഗമായി നടന്ന ജനകീയ പ്ലാസ്റ്റിക് മുക്ത വേമ്പനാട് മെഗാ കാമ്പയിനിന്റെ രണ്ടാം ഘട്ട പ്രവർത്തനങ്ങൾ നടന്നു. 9235.5 കിലോഗ്രാം പ്ലാസ്റ്റിക് മാലിന്യം ശേഖരിച്ച് നീക്കിയതായി ജില്ലാ കളക്ടര്‍ അലക്സ് വര്‍ഗീസ് അറിയിച്ചു. ജില്ലയിലെ 12 കേന്ദ്രങ്ങളിലാണ് ഒരേ സമയം ശുചീകരണപ്രവര്‍ത്തനങ്ങള്‍ നടന്നത്.
പ്ലാസ്റ്റിക് വിമുക്ത വേമ്പനാട്’ കാമ്പയിന്റെ രണ്ടാം ഘട്ടത്തിന്റെ ജില്ലാതല ഉദ്ഘാടനം തൈക്കാട്ടുശ്ശേരി ഫെറിയില്‍ പ്രിൻസിപ്പൽ ഡിസ്ട്രിക്ട് ആൻ്റ് സെഷൻസ് ജഡ്ജി കെ.കെ. ബാലകൃഷ്ണൻ നിർവഹിച്ചു.
ജലാശയങ്ങളെ മലിനമാക്കുന്ന പ്രവർത്തികൾക്കെതിരെ നിലകൊള്ളേണ്ടത് ജനങ്ങളുടെ ഉത്തരവാദിത്തമാണെന്ന് അദ്ദേഹം പറഞ്ഞു.
ടൂറിസ്റ്റ് കേന്ദ്രങ്ങൾ മാലിന്യ കൂമ്പാരമായതോടെ നമ്മുടെ നാട്ടിലേക്കുള്ള വിനോദസഞ്ചാരികളുടെ എണ്ണത്തിൽ വലിയ കുറവാണ് ഉണ്ടായത്. ഹൗസ് ബോട്ടുകളിൽ നിന്ന് പുഴയിലേക്ക് മാലിന്യം തള്ളുന്ന പ്രവണത തടയാൻ കർശന നടപടികൾ സ്വീകരിക്കണം.
മത്സ്യത്തൊഴിലാളികൾക്ക് തുഴ കൈമാറി ജില്ലാ കളക്ടർ അലക്സ് വർഗീസ് പരിപാടി ഫ്ലാഗ് ഓഫ് ചെയ്തു.
ജലാശയങ്ങൾ മാലിന്യം തള്ളാനുള്ള കേന്ദ്രങ്ങളാണെന്ന മനോഭാവം മാറ്റേണ്ടതുണ്ടെന്ന് അദ്ദേഹം പറഞ്ഞു. പുതിയ പഠനങ്ങളനുസരിച്ച് നിരന്തരമായ മാലിന്യ നിക്ഷേപങ്ങൾമൂലം കായലിന്റെ മൂന്നിൽ രണ്ട് ഭാഗവും നികന്നുവരുന്നു. ഇതുമൂലം വെള്ളപ്പൊക്ക ഭീഷണിയുമുണ്ട് – അദ്ദേഹം പറഞ്ഞു.
പട്ടണക്കാട് ബ്ലോക്ക് പഞ്ചായത്ത് പ്രസിഡന്റ് മേരി ടെൽഷ്യ ഉദ്ഘാടന ചടങ്ങില്‍ അധ്യക്ഷയായി. തുറവൂർ ഗ്രാമപഞ്ചായത്ത് പ്രസിഡന്റ് മോളി രാജേന്ദ്രൻ, വൈസ് പ്രസിഡന്റ് സി.ഒ. ജോർജ്, സ്റ്റാൻഡിങ് കമ്മിറ്റി തുടങ്ങിയവർ പങ്കെടുത്തു. സ്ത്രീകളുൾപ്പെടെയുള്ള മല്‍സ്യത്തൊഴിലാളികള്‍ കുത്തിയതോട് കിഴക്ക് ഭാഗം മുതല്‍ തുറവൂർ മൂലയിൽ പുരയിടം തെക്കുവശം വരെ വള്ളങ്ങളിലും മറ്റുള്ള സന്നദ്ധപ്രവര്‍ത്തകര്‍ കരയിലും ശുചീകരണ പ്രവര്‍ത്തനങ്ങള്‍ നടത്തി.
തുടര്‍ന്ന് ശേഖരിച്ച മാലിന്യങ്ങൾ ക്ലീൻ കേരള കമ്പനിക്ക് കൈമാറും.
സന്നദ്ധപ്രവര്‍ത്തകര്‍, മല്‍സ്യത്തൊഴിലാളികള്‍, ഹരിതകര്‍മ്മ സേന, കുടംബശ്രീ അംഗങ്ങള്‍ എന്നിവര്‍ പങ്കാളികളായി 12 കേന്ദ്രങ്ങളില്‍ സംഘടിപ്പിച്ച ശുചീകരണത്തില്‍ കായലില്‍ നിന്ന് മാലിന്യം നീക്കാനായി 314 വള്ളങ്ങള്‍ ഉപയോഗിച്ചു. ആലപ്പുഴ ജില്ലയിലെ 31 തദ്ദേശസ്വയംഭരണ സ്ഥാപനങ്ങളില്‍ ‘പ്ലാസ്റ്റിക് വിമുക്ത വേമ്പനാട്’ മെഗാ ക്യാമ്പയിന്‍ നടന്നുവരുകയാണ്. ഒന്നാം ഘട്ടത്തില്‍ 12 ടണ്‍ പ്ലാസ്റ്റിക് മാലിന്യം നീക്കിയിരുന്നു.