പുതുവത്സരത്തിൽ ഗുരുവായൂരിൽ നാഗസ്വര-തവിൽ സംഗീതോത്സവം
ഗുരുവായൂരിൽ ദേവസ്വത്തിൻ്റെ ആഭിമുഖ്യത്തിൽ പുതുവത്സര ദിനമായ ജനുവരി ഒന്നിന് നാഗസ്വര- തവിൽ സംഗീതോത്സവം അരങ്ങേറും. നാഗസ്വര-തവിൽ വാദന രംഗത്തെ ഗുരുശ്രേഷ്ഠരെ ചടങ്ങിൽ പുരസ്കാരം നൽകി ആദരിക്കും. ഞായറാഴ്ച രാവിലെ 5.30 ന് തെക്കേനട ശ്രീ ഗുരുവായൂരപ്പൻ ഓഡിറ്റോറിയത്തിലെ സംഗീത മണ്ഡപത്തിൽ ദീപം തെളിയിക്കുന്നതോടെ സംഗീതോത്സവത്തിന് തുടക്കമാകും.
നാഗസ്വരം, തവിൽ വാദകർ ചേർന്ന് ഗുരുവായൂരപ്പന് ആദ്യം മംഗളവാദ്യ സമർപ്പണം നടത്തും. തുടർന്ന് നാഗസ്വരപഞ്ചരത്നവും തനിയാവർത്തനവും അരങ്ങേറും. രാവിലെ 11ന് നടക്കുന്ന സമാദരണ സദസിൻ്റെ ഉദ്ഘാടനം കേരള സംഗീത നാടക അക്കാദമി ചെയർമാൻ മട്ടന്നൂർ ശങ്കരൻ കുട്ടി മാരാർ നിർവ്വഹിക്കും. ദേവസ്വം ചെയർമാൻ ഡോ.വി.കെ.വിജയൻ അധ്യക്ഷനാകും.
ചടങ്ങിൽ ഗുരുവായൂർ കുട്ടിക്കൃഷ്ണൻ നായർ സ്മാരക പുരസ്ക്കാരം നാഗസ്വരം വിദ്വാൻ കൊടുവായൂർ ശക്തിവേലിനും മുത്തരശനല്ലൂർ ആർ.രാമചന്ദ്രൻ സ്മാരക പുരസ്ക്കാരം തവിൽ വിദ്യാൻ തിരുനാഗേശ്വരം ടി.ആർ. സുബ്രഹ്മണ്യത്തിനും സമ്മാനിക്കും. ദേവസ്വം ഭരണസമിതി അംഗം മല്ലിശേരി പരമേശ്വരൻ നമ്പൂതിരിപ്പാട് പുരസ്കാര ജേതാക്കളെ പൊന്നാടയണിയിക്കും.
ഗുരുവായൂർ മുരളി പുരസ്കാര ജേതാക്കളെ പരിചയപ്പെടുത്തും. ക്ഷേത്രം തന്ത്രിയും ദേവസ്വം ഭരണസമിതി അംഗവുമായ പി.സി.ദിനേശൻ നമ്പൂതിരിപ്പാട് പുരസ്ക്കാരങ്ങൾ സമ്മാനിക്കും. മമ്മിയൂർ ദേവസ്വം പ്രസിഡൻ്റ് ജി.കെ.പ്രകാശൻ മുഖ്യാതിഥിയാകും. നാഗസ്വരവിദ്വാൻ തിരുവിഴ ജയശങ്കർ വിശിഷ്ടാതിഥിയായി പങ്കെടുക്കും. ദേവസ്വം ഭരണസമിതി അംഗം സി.മനോജ് അഡ്മിനിസ്ട്രേറ്റർ കെ.പി.വിനയൻ എന്നി പ്രസംഗിക്കും.