ജീനോമിക് സീക്വൻസിങ് പ്രോജക്ടുകൾക്ക് ധനസഹായം
കേരള ഡെവലപ്‌മെന്റ് ആൻഡ് ഇന്നൊവേഷൻ സ്ട്രാറ്റജിക് കൗൺസിലിന്റെ (കെ-ഡിസ്ക്) നേതൃത്വത്തിൽ ആരംഭിച്ച കേരള ജീനോം ഡേറ്റാ സെന്റർ ജീനോമിക് സീക്വൻസിംഗ് ആന്റ് ഡേറ്റാ ജനറേഷൻ പ്രോജക്ടുകൾക്ക് ധനസഹായം നൽകുന്നു.
പ്ലാന്റ് ജീനോമിക്‌സ്,ആനിമൽ ജീനോമിക്‌സ്,മൈക്രോബയൽ ജീനോമിക്‌സ്,മറൈൻ ജീനോമിക്‌സ്,സിക്കിൾ സെൽ അനീമിയ, ഡെങ്കിപ്പനി തുടങ്ങിയവയിൽ ശ്രദ്ധ കേന്ദ്രീകരിച്ച് ഗവേഷണം നടത്തുന്ന സ്ഥാപനങ്ങളിലെ ശാസ്ത്രജ്ഞർ, ഗവേഷകർ എന്നിവർക്ക് ധനസഹായത്തിനായി കെ.ജി.ഡി.സി അപേക്ഷ ക്ഷണിച്ചു.
ഗ്രാന്റുകൾക്ക് സയന്റിഫിക് അഡ്വൈസറി ബോർഡ് അംഗീകാരം നൽകും. കൂടാതെ പ്രോജക്ടിന്റെ വ്യാപ്തിയും സാധ്യതയും അനുസരിച്ച് 10 ലക്ഷം മുതൽ രണ്ട്കോടി രൂപ വരെ ഗ്രാന്റ് ലഭിക്കാനുള്ള അർഹതയുണ്ട്. താൽപ്പര്യമുള്ള ഗവേഷകരും സ്ഥാപനങ്ങളും തങ്ങളുടെ പ്രോജക്ട് പ്രൊപ്പോസലുകൾ കെ.ജി.ഡി.സിയുടെ വെബ്സൈറ്റ് വഴി ഓൺലൈനായി സമർപ്പിക്കണം.
ശാസ്ത്രീയ പ്രാധാന്യം, പദ്ധതിയുടെ സാധ്യത, കേരളത്തിനുള്ള നേട്ടങ്ങൾ, വാണിജ്യവൽക്കരണ സാധ്യതകൾ, നൂതനാശയം, കെ.ജി.ഡി.സിയുടെ ലക്ഷ്യങ്ങളുമായുള്ള പൊരുത്തപ്പെടൽ എന്നിങ്ങനെയുള്ള ഘടകങ്ങളുടെ അടിസ്ഥാനത്തിലാണ് ധനസഹായത്തിന് അർഹതയുള്ള പദ്ധതികളെ വിലയിരുത്തുന്നത്. വിശദമായ മൂല്യനിർണ്ണയ മാനദണ്ഡങ്ങൾ കെ.ജി.ഡി.സി പോർട്ടലിൽ പ്രസിദ്ധീകരിച്ചിട്ടുണ്ട്.
അപേക്ഷിക്കുന്ന സ്ഥാപനങ്ങളും ഗവേഷകരും കേരളത്തിൽ നിന്നുള്ളവരായിരിക്കണം. കേരളത്തിന് പുറത്ത് നിന്നുള്ള ഒരു സ്ഥാപനം അപേക്ഷിക്കുകയാണെങ്കിൽ അവർക്ക് കേരളം ആസ്ഥാനമായുള്ള ലൈഫ് സയൻസ് സ്ഥാപനവുമായി പങ്കാളിത്തമോ ധാരണാപത്രമോ ഉണ്ടായിരിക്കണം.
ഡി.എസ്.ഐ.ആർ സർട്ടിഫൈഡ് ലബോറട്ടറിയുള്ള സ്വകാര്യ സ്ഥാപനങ്ങളിൽ നിന്നുള്ള ഗവേഷകർക്കും അപേക്ഷിക്കാം. മാർഗ്ഗനിർദ്ദേശങ്ങൾക്കും അപേക്ഷാ ഫോമുകൾക്കും കെജിഡിസി വെബ്സൈറ്റ് www.kgdc.kerala.gov.in സന്ദർശിക്കുക.