ഗുരുവായൂർ ദേവസ്വം നാഗസ്വര-തവിൽ സംഗീതോത്സവം1ന്

ഗുരുവായൂർ ദേവസ്വം നാഗസ്വര- തവിൽ സംഗീതോത്സവം 2025 ജനുവരി ഒന്നിന് നടക്കും. രാവിലെ 5.30ന് ക്ഷേത്രത്തിൽ നിന്ന് നാഗസ്വരത്തിൻ്റെ അകമ്പടിയോടെ ദീപം എഴുന്നള്ളിച്ച് തെക്കേ നടയിലെ
ശ്രീഗുരുവായൂരപ്പൻ ഓഡിറ്റോറിയത്തിലെ സംഗീത മണ്ഡപത്തിലെത്തിച്ച്  നിലവിളക്ക് തെളിയിക്കുന്നതോടെ സംഗീതോത്സവത്തിന് തുടക്കമാകും.

തുടർന്ന്  നാഗസ്വര- തവിൽ വിദ്വാൻമാരുടെ മംഗളവാദ്യ സമർപ്പണം നടക്കും. ഗുരുവായൂരപ്പന് മുന്നിൽ നാഗസ്വര- തവിൽ നാദാർച്ചന  നടത്താൻ നിരവധി കലാകാരൻമാർ എത്തിച്ചേരും. രാവിലെ 11 മണിക്ക് നാഗസ്വര പഞ്ചരത്നം, തനിയാവർത്തനം അരങ്ങേറും. 11.30 ന് സമാദരണ സദസിൻ്റെ ഉദ്ഘാടനവും പുരസ്ക്കാര സമർപ്പണവും കവിയും ചലച്ചിത്ര ഗാന രചയിതാവുമായ കൈതപ്രം ദാമോദരൻ നമ്പൂതിരി നിർവ്വഹിക്കും.

ചടങ്ങിൽ  നാഗസ്വരം വിദ്വാനായിരുന്ന ഗുരുവായൂർ കുട്ടികൃഷ്ണൻ നായർ സ്മാരക പുരസ്ക്കാരം ആചാര്യനായ ആച്ചാൾപുരം എസ്.ചിന്നത്തമ്പി പിളളയ്ക്കും മുത്തരശനല്ലൂർ ആർ.രാമചന്ദ്രൻ സ്മാരക പുരസ്കാരം തവിൽ വിദ്വാൻ ആച്ചാൾപുരം എസ്.ശങ്കരനും അദ്ദേഹം സമ്മാനിക്കും. ദേവസ്വം ഭരണസമിതി അംഗം  മല്ലിശേരി പരമേശ്വരൻ നമ്പൂതിരിപ്പാട്  അധ്യക്ഷനാകും.

നാഗസ്വര വിദ്വാൻ ഗുരുവായൂർ മുരളി ചടങ്ങിൽ ആമുഖഭാഷണം നടത്തും. നാഗസ്വര വിദ്വാൻ മരുത്തോർവട്ടം ബാബു, തവിൽ വിദ്വാൻ ഓച്ചിറ ഭാസ്ക്കരൻ എന്നിവർ പുരസ്ക്കാര ജേതാക്കളെ പരിചയപ്പെടുത്തും. മമ്മിയൂർ ദേവസ്വം ചെയർമാൻ ജി.കെ.പ്രകാശൻ മുഖ്യാതിഥിയാകും.