സപ്ലൈകോ ഉല്പന്നങ്ങള് ഇനി വീട്ടിലെത്തും
സപ്ലൈകോ ഉല്പന്നങ്ങള് ഇനി വീട്ടിലെത്തും. അതും 30 ശതമാനം വരെ വിലക്കുറവോടെ. ഓൺലൈൻ വില്പനയുടെ സംസ്ഥാനതല ഉദ്ഘാടനവും ‘സപ്ലൈ കേരള’ മൊബൈൽ ആപ്പ് ലോഞ്ചും തൃശ്ശൂരിൽ നടന്നു.
തൃശ്ശൂരിലെ മൂന്ന് ഔട്ട്ലെറ്റുകളിലാണ് പരീക്ഷണാടിസ്ഥാനത്തില് സപ്ലൈകോ ഹോം ഡെലിവറി ആദ്യഘട്ടം തുടങ്ങുകയെന്ന് മുഖ്യമന്ത്രി പിണറായി വിജയൻ അറിയിച്ചു. രണ്ടാംഘട്ടം 2022 ജനുവരി ഒന്നിന് എല്ലാ കോര്പറേഷന് ആസ്ഥാനങ്ങളിലെയും സൂപ്പര്മാര്ക്കറ്റുകളില് തുടങ്ങും. മൂന്നാംഘട്ടം ഫെബ്രുവരി ഒന്നിന് ജില്ലാ ആസ്ഥാനങ്ങളിലെ സൂപ്പര്മാര്ക്കറ്റുകളിലും നടപ്പിലാക്കിയതിനു ശേഷം കുറവുകൾ പരിഹരിച്ച് നാലാംഘട്ടം മാര്ച്ച് 31ന് മുന്പായി കേരളത്തിലെ എല്ലാ സൂപ്പര്മാര്ക്കറ്റുകളിലും നടപ്പാക്കും.
ആകർഷകമായ ഓഫറുകളും ഉപഭോക്താക്കൾക്ക് സമ്മാനിക്കും. ഓണ്ലൈന് ബില്ലിന് അഞ്ചു ശതമാനം കിഴിവുണ്ടാകും. 1000 രൂപയ്ക്കുമുകളിലുള്ള ബില്ലിന് അഞ്ചു ശതമാനം കിഴിവിനൊപ്പം ഒരു കിലോ ശബരി ചക്കി ആട്ട നല്കും. 2000 രൂപയ്ക്കുമുകളിലുമുള്ള ബില്ലിന് അഞ്ചു ശതമാനം കിഴിവിനൊപ്പം 250 ഗ്രാം ജാര് ശബരി ഗോള്ഡ് തേയില നല്കും. 5000 രൂപയ്ക്ക് മുകളിലെ ബില്ലിന് അഞ്ചു ശതമാനം കിഴിവിനൊപ്പം ശബരി വെളിച്ചെണ്ണയുടെ ഒരു ലിറ്റര് പൗച്ചും നല്കും.
കേരളത്തിലെ ഏകദേശം അഞ്ഞൂറിലധികം വരുന്ന സപ്ലൈകോ സൂപ്പര് മാര്ക്കറ്റുകളിലൂടെ അവയുടെ 10 കിലോമീറ്റർ ചുറ്റളവില് ഹോം ഡെലിവറി നടത്താനാണ് പദ്ധതിയിലൂടെ ലക്ഷ്യമിടുന്നത്. നാല് കിലോമീറ്ററിനുള്ളില് അഞ്ച് കിലോ തൂക്കം വരുന്ന ഒരു ഓര്ഡര് വിതരണം ചെയ്യുന്നതിന് ചുരുങ്ങിയത് 35 രൂപ രൂപയും ജിഎസ്ടിയുമാണ് ഈടാക്കുന്നത്. എന്നാല് അധിക ദൂരത്തിനും ഭാരത്തിനും അനുസരിച്ച് വിതരണ നിരക്ക് വര്ധിപ്പിക്കുന്നതാണ്.