നിയമസഭ ലൈബ്രറി ശതാബ്ദി: ഉത്തരമേഖല ആഘോഷം തുടങ്ങി

1888 ൽ ആരംഭിച്ച തിരുവിതാംകൂർ ദിവാന്റെ ഓഫീസ് ലൈബ്രറിയാണ് 1921ൽ ലെജിസ്ലെച്ചർ ലൈബ്രറിയെന്ന് നാമകരണം ചെയ്യപ്പെട്ടത്. പിന്നീട് നിയമസഭ ലൈബ്രറി എന്ന് പുനർനാമകരണം ചെയ്യപ്പെട്ട ലൈബ്രറിയിൽ 1,15,000 ത്തിലധികം പുസ്തകങ്ങളും അമൂല്യവും ചരിത്ര പ്രാധാന്യമുള്ളതുമായ അപൂര്‍വ്വ രേഖകളും ഉണ്ട്.

നൂറാം വാർഷിക ആഘോഷങ്ങളോട് അനുബന്ധിച്ച്‌ ലൈബ്രറിയുടെ ശേഖരങ്ങൾ, പ്രവർത്തനം, സേവനങ്ങൾ എന്നിവ പൊതുജനങ്ങളിലേക്ക് എത്തിക്കുന്നതിനായി ജില്ലകൾ കേന്ദ്രീകരിച്ച് വിവിധ പരിപാടികൾ നടന്നു വരികയാണ്. ഇതോടൊപ്പം നിയമസഭ ലൈബ്രറി പൊതുജനങ്ങൾക്കായി തുറന്നു കൊടുക്കുന്നതും പരിഗണനയിലുണ്ടെന്ന് സ്പീക്കർ അറിയിച്ചു. ലൈബ്രറിയിലെ വിപുലമായ പുസ്തകശേഖരണവും പഠനസാമഗ്രികളും വിദ്യാർത്ഥികളും ഗവേഷകരും അധ്യാപകരും ഉൾപ്പെടുന്ന കൂടുതൽ ജനങ്ങൾക്ക് പ്രയോജനപ്പെടേണ്ടതുണ്ടെന്നും സ്പീക്കർ പറഞ്ഞു.