കേരള സ്കൂൾ കായിക മേളയ്ക്ക് തിങ്കളാഴ്ച തിരിതെളിയും
കേരള സ്കൂൾ കായിക മേളയുടെ ഉദ്ഘാടനം നവംബർ നാലിന് തുടങ്ങും. വൈകുന്നേരം നാലിന് എറണാകുളം മഹാരാജാസ് കോളജ് ഗ്രൗണ്ടിൽ വിദ്യാഭ്യാസ മന്ത്രി വി. ശിവൻകുട്ടി നിർവഹിക്കും.
സാംസ്കാരിക പരിപാടിയുടെ ഉദ്ഘാടനം മമ്മൂട്ടി നിർവഹിക്കും. വിദ്യാഭ്യാസ മന്ത്രിയും കായികമേള ബ്രാൻഡ് അംബാസഡർ ഒളിമ്പ്യൻ പി. ആർ. ശ്രീജേഷും ചേർന്ന് ദീപശിഖ തെളിയിക്കുന്നതോടെ മേളയ്ക്ക് തുടക്കമാകും.
ചടങ്ങിൽ വ്യവസായ മന്ത്രി പി.രാജീവ് അധ്യക്ഷനാകും. മന്ത്രിമാരായ കെ. രാജൻ, റോഷി അഗസ്റ്റിൻ, കെ. കൃഷ്ണൻകുട്ടി, എ.അബ്ദു റഹ്മാൻ, ആർ.ബിന്ദു, ജി.ആർ. അനിൽ, എം ബി രാജേഷ്, പി. എ. മുഹമ്മദ് റിയാസ്, ഒ.ആർ.കേളു എന്നിവർ മുഖ്യാതിഥികളാവും. പ്രതിപക്ഷനേതാവ് വി.ഡി. സതീശൻ മുഖ്യ പ്രഭാഷണം നടത്തും.
3500 വിദ്യാർത്ഥികൾ പങ്കെടുക്കുന്ന മാർച്ച് പാസ്റ്റും ആലുവ മുതൽ ഫോർട്ട്‌ കൊച്ചി വരെയുള്ള 32 സ്‌കൂളുകളിൽ നിന്നുള്ള 4,000 വിദ്യാർത്ഥികൾ പങ്കെടുക്കുന്ന സാംസ്കാരിക പരിപാടിയും ഉദ്ഘാടന ചടങ്ങിന് മാറ്റ് കൂട്ടും.
ഉദ്ഘാടന ചടങ്ങിനു ശേഷം ബാൻഡ് മാർച്ച് ആരംഭിക്കും. പിന്നീട് കൊച്ചിയെ പ്രതിനിധാനം ചെയ്ത് ക്വീനും ഫ്ലവർ ഗേൾസും മാർച്ച് ചെയ്യും.100 മുത്തുക്കുടകൾ അകമ്പടി സേവിക്കും. നേവൽ എൻ.സി.സി.കേഡറ്റുകളുടെ ട്വന്റി ഫോർ കൊച്ചി ഫോർമേഷനും നടക്കും. തുടർന്ന് ആയിരം പേരുടെ മാസ് ഡ്രിൽ. ആയിരം പേർ അണിനിരക്കുന്ന സൂമ്പ. ആയിരം പേർ അണിനിരക്കുന്ന ഫ്രീ ഹാൻഡ് എക്സർസൈസ് എന്നിവ ഉണ്ടാകും.