പൂച്ചെണ്ടും ഹൽവയും നൽകി കലാപ്രതിഭകൾക്ക് വരവേൽപ്പ്
പൂച്ചെണ്ടും കോഴിക്കോട്ടെ ഹൽവയും നൽകി കലാപ്രതിഭകൾക്ക് സ്വീകരണം. കേരള സ്കൂൾ കലോത്സവത്തിൽ പങ്കെടുക്കാൻ തെക്കൻ ജില്ലകളായ തിരുവനന്തപുരം, കൊല്ലം, കോട്ടയം, ആലപ്പുഴ എന്നിവടങ്ങളിൽ നിന്നെത്തിയ ആദ്യ സംഘത്തെയാണ് മന്ത്രിമാരുടെ
നേതൃത്വത്തിൽ സ്വീകരിച്ചത്. മന്ത്രിമാരായ വി.ശിവൻകുട്ടി, പി.എ. മുഹമ്മദ് റിയാസ് എന്നിവരുടെ നേതൃത്വത്തിലാണ് കോഴിക്കോട് റെയിൽവേ സ്റ്റേഷനിൽ സ്വീകരണമൊരുക്കിയത്.
ജനശതാബ്ദി എക്സ്പ്രസിൽ കോഴിക്കോട് റെയിവേ സ്റ്റേഷനിൽ ഉച്ചയോടെ എത്തിയ കലാപ്രതിഭകളെ പൂച്ചെണ്ടുകൾ നൽകി ഹാരാർപ്പണം നടത്തി സ്വീകരിച്ചു. കോഴിക്കോടിന്റെ തനതായ മധുരം കോഴിക്കോടൻ ഹൽവയും വിദ്യാർത്ഥികൾക്ക് നൽകി. വാദ്യഘോഷങ്ങളുടെ അകമ്പടിയോടെ കലാപ്രതിഭകളെ സ്വീകരിച്ച് മന്ത്രിമാർ പ്രത്യേകം സജ്ജീകരിച്ച കലോത്സവ വണ്ടിയിൽ കയറ്റി. എം.എൽ.എമാരായ ഇ.കെ വിജയൻ, പി.ടി.എ റഹീം തുടങ്ങിയവർ സ്വീകരണത്തിൽ പങ്കെടുത്തു.