സ്ക്കൂൾ കലോത്സവ സ്വർണ്ണക്കപ്പ് കോഴിക്കോട്ടെത്തി
കലാസ്വാദകരുടെ സ്വീകരണങ്ങൾ ഏറ്റുവാങ്ങി സ്ക്കൂൾ കലോത്സവ ജേതാക്കൾക്കുള്ള സ്വർണ്ണക്കപ്പ് കോഴിക്കോട്ടെത്തി. പാലക്കാട് നിന്ന് കൊണ്ടുവന്ന സ്വർണ്ണക്കപ്പ് ജില്ലാ അതിർത്തിയായ രാമനാട്ടുകരയിൽ മന്ത്രിമാരായ വി. ശിവൻകുട്ടിയും പി.എ. മുഹമ്മദ് റിയാസും ചേർന്ന് ഏറ്റുവാങ്ങി.
ഘോഷയാത്രയായാണ് കപ്പ് കോഴിക്കോട് നഗരത്തിലേക്ക് എത്തിച്ചത്. ഫറോക്ക്ചുങ്കം, ഫറോക്ക് ബസ് സ്റ്റാന്റ്, ചെറുവണ്ണൂർ സ്രാമ്പ്യ, മോഡേൺ എന്നിവിടങ്ങളിൽ വിവിധ സ്കൂളുകൾ ചേർന്ന് ഘോഷയാത്രയ്ക്ക് വർണ്ണാഭമായ സ്വീകരണം നൽകി. തുടർന്ന് സ്വർണ്ണക്കപ്പുമായുള്ള ഘോഷയാത്ര കോഴിക്കോട് മുതലക്കുളം മൈതാനിയിൽ എത്തിച്ചേർന്നു. എം.എൽ.എ മാരായ കെ. പി കുഞ്ഞമ്മദ് കുട്ടി, കെ.എം.സച്ചിൻ ദേവ്, മേയർ ഡോ.ബീന ഫിലിപ്പ്, ഡി.ഡി ഇ. മനോജ്‌ കുമാർ, പി.പി ഫിറോസ് തുടങ്ങിയവർ പങ്കെടുത്തു. ജനുവരി മൂന്നു മുതൽ ഏഴു വരെയാണ്‌ കോഴിക്കോട്ട്‌ കേരള സ്കൂൾ കലോത്സവം നടക്കുന്നത്.