കൈകൊണ്ട് ബ്രഷിൽ  മനോഹര മലയാളം എഴുതിയ കാലം

തറ, പറ, പന…. ഒന്നാം ക്ലാസ് പാഠപുസ്തകത്തിലെ ആ വർണ്ണചിത്രങ്ങൾ ഇന്നും എല്ലാവരുടെയും മനസ്സിലുണ്ടാകും. പ്രൈമറി പാഠപുസ്തകങ്ങളിലെ വർണ്ണചിത്രങ്ങൾ ഒരു കാലത്ത് കുട്ടികൾക്ക് ഹരമായിരുന്നു. ഒന്നു മുതൽ നാലുവരെയുള്ള കേരളപാഠാവലി മലയാളം പുസ്തകത്തിലെ ചിത്രങ്ങൾ ആർക്കും മറക്കാൻ കഴിയില്ല.

 

ആ ചിത്രങ്ങൾ വരച്ച എറണാകുളം വടുതല സ്വദേശിയായ ചിത്രകാരൻ സി.എന്‍. രാജു അന്നത്തെ കാലം ഓർത്തെടുത്തു. അറുപതുകളിലെ പാഠപുസ്തകങ്ങൾ പിന്നീട് പരിഷ്ക്കരിച്ചപ്പോൾ ചിത്രങ്ങൾ വരച്ചത് രാജു വായിരുന്നു. ജീവശാസ്ത്രം, രസതന്ത്രം, ഊർജ്ജതന്ത്രം, ഭൂമിശാസ്ത്രം തുടങ്ങിയ പുസ്തകങ്ങളുടെ കവർ ചിത്രങ്ങളൊരുക്കി പേജുകളിലും ഇല്ലസ്ട്രേഷൻ ചെയ്തു.

ടെക്സ്റ്റ് ബുക്കുകൾ, മറ്റ് പുസ്തകങ്ങൾ, മാസികകൾ , പോസ്റ്ററുകള്‍,
ലോഗോ തുടങ്ങി രാജുവിന്റെ വിരൽതുമ്പിലൂടെ വിരിഞ്ഞ ചിത്രങ്ങൾക്ക് കണക്കില്ല. ജലച്ചായം, ഓയിൽ, അക്രലിക് തുടങ്ങിയ മീഡിയങ്ങളിലായി നൂറുകണക്കിന് പെയിന്റിങ്ങുകൾ, വലിയ ഹോർഡിങ്ങ്, എക്സിബിഷൻ പവലിയൻ തുടങ്ങി എല്ലാ മേഖലയിലും കൈ വെച്ചു.

 

 

മാസികകളിലും പുസ്തകങ്ങളിലും അക്കാലത്ത് ചിത്രങ്ങൾ വരക്കുക മാത്രമല്ല തലക്കെട്ടുകൾ കമനീയമായി എഴുതുകയും വേണം. അതിന് സ്വന്തമായി ഭംഗിയുള്ള അക്ഷരങ്ങൾ ഉണ്ടാക്കണം.അങ്ങിനെ രാജുവിന്റെ കൈകളിലൂടെ ഒരു മലയാളം കാലിഗ്രഫി തന്നെ പിറന്നു. രാജുവിന് ഈ കലാവിരുത് പാരമ്പര്യമായി കിട്ടിയതാണ്.

 

 ഇളയച്ഛൻ ആർട്ടിസ്റ്റ് കെ.ജി.വാസു കുറേകാലം പൂമ്പാറ്റ മാസികയിൽ വരച്ചിരുന്നു. കുഞ്ചാക്കോയുടെ ഉദയാ സ്റ്റുഡിയോയിലെ ആർട്ട് ഡയരക്ടറായിരുന്ന വി.എം.ബാലൻ എറണാകുളത്ത് ചിത്രശാല എന്ന സ്റ്റുഡിയോ നടത്തിയിരുന്നു. അദ്ദേഹം പ്രസിദ്ധീകരിച്ചിരുന്ന ‘ലോക പരിചയം’ എന്ന മാസികയിൽ ചിത്രങ്ങൾ വരച്ചത്  വാസുവായിരുന്നു.

 

ഇളയച്ഛന്റെ കീഴിൽ ചിത്രകല പഠിച്ച ശേഷം രാജു കെ.ജി.ടി.ഇ. പെയിന്റിങ്ങ്  പാസായി. കൊച്ചിൻ സ്ക്കൂൾ ഓഫ് ആർട്സിലും പഠിച്ചു. 1978ൽ എറണാകുളത്ത് കാക്കനാട് ടെക്സ്റ്റ് ബുക്ക്പ്രസ്സിൽ (കെ.ബി.പി.എസ്സ്.) ആർട്ടിസ്റ്റായി ജോലി കിട്ടി.വിദ്യാഭ്യാസ വകുപ്പിന്റെ ടെക്സ്റ്റ് ബുക്കുകളിലെല്ലാം ചിത്രങ്ങൾ വരച്ചു.

മാത്രമല്ല ഇവിടെ നിന്ന് പ്രിന്റ് ചെയ്ത മറ്റ് പുസ്തകങ്ങളുടെ കവറുകൾ ഡിസൈൻ ചെയ്തു. സത്യദീപം, കുടുംബദീപം, താലന്ത്‌, വചനോത്സം തുടങ്ങിയ മാസികകൾ വരച്ച് ലേഔട്ട് ചെയ്തു. കഥാകൃത്ത് സതീഷ് ബാബു പയ്യന്നൂർ പത്രാധിപരായി കാസർകോട് നിന്ന് പ്രസിദ്ധീകരിച്ച ‘ഈയാഴ്ച’ ആഴ്ചപ്പതിപ്പിലും വരച്ചു.

കേരള ലളിതകല അക്കാദമിയുടെ ക്യാമ്പുകളിലും ചിത്ര പ്രദർശനങ്ങളിലും പലപ്പോഴായി പങ്കെടുത്തിട്ടുണ്ട്. ചിത്രകലാ പരിഷത്തിന്റെ നെയ്യാർ ഡാം ക്യാമ്പിലും, തൃശൂർ ടൗൺ ഹാളിലെ ക്യാമ്പിലും, കൊച്ചിൻ ആർട്ട് ഫെയർ ചിത്ര പ്രദർശനത്തിലും പങ്കെടുത്തിട്ടുണ്ട്.

ജോലിയിൽ നിന്ന് വിരമിച്ച ശേഷം സ്വന്തമായി ഒരു ഡിസൈൻ സ്ഥാപനം നടത്തി വരികയാണ്. പരേതരായ ചെറുപിള്ളി നാരായണന്റെയും കമലാക്ഷിയുടേയും മകനാണ്. ഭാര്യ രാധാമണി. മകൾ ഗീതു സി.രാജു ചെന്നൈയിൽ വിപ്രോയിൽ എഞ്ചിനിയറാണ്. മകൻ സി.ആർ.ഗോപു എറണാകുളത്ത് ഇൻഫോ പാർക്കിൽ വിപ്രോയിൽ ജോലി ചെയ്യുന്നു.