പേരാമ്പ്ര ഫാമിൽ കൃത്യതാ കൃഷിയിലൂടെ പച്ചക്കറി
പാവൽ, പടവലം, കുമ്പളം, വഴുതന, ചീര തുടങ്ങിയ പച്ചക്കറികൾ തഴച്ചുവളരുകയാണ് ഈ ഫാമിൽ. പച്ചക്കറി വിളകളിൽ ഉത്പാദന വർദ്ധനവിന് സഹായിക്കുന്ന കൃത്യതാ കൃഷിക്ക് കോഴിക്കോട് പേരാമ്പ്ര സീഡ് ഫാമിൽ തുടക്കമായി.
ശാസ്ത്രീയമായി കൃഷിയിടം തയ്യാറാക്കി അടിവളങ്ങളും ജൈവ വളവും നൽകി തുള്ളിനനയിലൂടെ വെള്ളവും വളവും നൽകുകയും പ്ലാസ്റ്റിക്ക് പുതയിടൽ അനുവർത്തിക്കുകയും ചെയ്യുന്ന രീതിയാണ് കൃത്യതാ കൃഷി. വെള്ളത്തിൽ ലയിപ്പിക്കുന്ന വളങ്ങൾ ചെടിയുടെ വളർച്ചാ ഘട്ടത്തിനനുസരിച്ച് പോഷക മൂലകങ്ങളുടെ തോത് നിശ്ചയിച്ച് നൽകുന്നു.
ഇത്തരത്തിൽ നൽകുന്നതിലൂടെ പോഷക മൂലകങ്ങൾ നേരിട്ട് വേരു പടലങ്ങളിൽ എത്തുകയും ചെടി അവ കാര്യക്ഷമമായി ഉപയോഗിക്കുകയും ചെയ്യുന്നു. തുള്ളി നനയിലൂടെ ആവശ്യമായ വെള്ളം കൃത്യമായ അളവിൽ നൽകാനും വെള്ളം ലാഭിക്കാനും സാധിക്കുന്നു.
ഈ രീതിയിലൂടെ ഉല്പാദനം പരമ്പരാഗത രീതിയെ അപേക്ഷിച്ച് മൂന്നിരട്ടിയിലധികമായി വർദ്ധിപ്പിക്കാൻ സാധിക്കും. കർഷകർക്ക് വന്ന് കണ്ട് പഠിക്കാനുള്ള പ്രദർശന തോട്ടം എന്ന നിലയിലാണ്‌ ഫാമിൽ തോട്ടം സജ്ജമാക്കിയിരിക്കുന്നതെന്ന് കൃഷി അസി. ഡയരക്ടറും പേരാമ്പ്ര ഫാമിൻ്റെ തലവനുമായ പി. പ്രകാശ് പറഞ്ഞു.